الديتوكس✨

 

السلام عليكم ورحمه الله وبركاته

خلوني أكلمكم عن الديتوكس كثييير يسألوا عنه وفيه اللي يقول انها مويا وجواتها فواكه أو خضار 🤷🏻‍♀️ واللي يقول انه فيه ديتوكس للشعر وديتوكس للبشره وكل ذَا الحكي عباره عن “إعلانات”🙅🏻‍♀️ والله اعلان فقط هما استغلوا انتشار كلمه الديتوكس وأنها مرتبطه بتنظيف الجسم

فيه اللي جابوا حبوب مثلها مثل الملين وهذي وظيفتها انها تنظف المعده وكلام فاضي وقالوا ديتوكس 🙄 وهي نتايجها نفس شاي الاعشاب
والنوع اللي هوا طين للبشره وقالوا يصفي وكلام فاضي وهي صدقوني م تختلف عن الماسكات العاديه اللي نسويها 💆🏻‍♀️
والهير ديتوكس اللي هوا كيس فيلو شيء سائل وتحطيه ع شعرك ويقولك حيطلع شعرك يبرق وناعم وقوي وينظف المسام وينعش وكلام إعلانات وهو نفففس الماسكات العاديه
هذول الثلاث كذب كذب كذب وكلام فاضي والله فقط عشان يكسبوا فلوس ومالهم اَي فايده ولايستاهلوا القيمه اللي حاطينها عليها 🙂💔

اما تبع المويا وتقطعي شرائح خيار شرائح فراوله شرايح كوسا هذي بس عشان إنتي تحبي المويا ويصير له نكهه بس مو ديتوكس كمان ، حتجي وحده تقول أنا جربت وكنت ادخل الحمام أو بتقول انحف ببساطه مو هما يقولوا لك عشان تنحني وقت الديتوكس لازم تتبعي النظام الغذائي الفلاني ولا م حتشوفي نتيجه ترا نفسه لو اتبعتي نظام كويس بتنحفي 😂

طيب اجل ايش هول الديتوكس؟ كيف انظف جسمي ؟ كيف اخلي بشرتي حلوه ونضره؟😍🙊

سهل مرره عدلي نظام حياتك🌚 تبغي بشره نضره؟ كلي فواكه وخضار كثير 🍏🍐🥦🥒 واشربي مويا ع حسب احتياجك ونامي بدري .

تبغي تنظفي جسمك حعطيك مشروب بس قوي تراه وينشرب مررره بالشهر مره وحده بس 🌚( ع حجم يدك حطي سناء مكي بصحن ، شوي حُمر ، ملعقه أكل كمون، ملعقة اكل ينسون ، ملعقه صغيره زيت زيتون وكوب مويا حاره) من الليل تعمليه وتتركيه يتنقع لحاله اول م تصحي تشربي كوب مويا فقط وبعده تصفي اللي عملتيه وتشربيه بعده بساعه تقدري تأكلي . أنا اول مره شربته وربي قعدت ابكي بالحمام من الالم😄 وعادي كونه اول مره اعمله ولاتستحوا بنات بس نصيحه اعملوه بيوم اقعدوا لحالكم فيه وبتحتاجوا مويا كثير وترتاحوا 😶.
يعني من الان لاتخلوا احد يخدعكم هذا ينظف الجسم وهذا ديتوكس وهذا وهذا كللله كذب والله🙅🏻‍♀️  وأي سؤال أنا حاضره اكتبوه تحت ترا اقرأ كلامكم 💖💖